Ֆատատո
Ֆատատոն՝ քո փոքրիկ հեքիաթը՝ «Այբ»-ից մինչև «Ֆե» ստեղծվում է Շինարարների 24-ում՝ ավտոտնակում: Արդեն երկու տարի է ընկերությունն իր սպառողին է առաջարկում ֆատատոներ, որոնք կարող են լինել կավե տնակի, ժամացույցի, մոմակալի, մագնիսի ու տոնածառի խաղալիքի տեսքով:
Առաջին Ֆատատոն ստեղծվել է ոչ թե հաջողակ և շահութաբեր բիզնես նախագիծ սկսելու նպատակով, այլ սիրելիին հետաքրքիր և յուրօրինակ նվեր մատուցելու ցանկությամբ: Իսկ Ֆատատոյի առաջին սեփականատերն էլ այն վերածեց ստարտափի:
Աշխատանքի բաժանումը «Ֆատատո» ընկերությունում պարզ է. համահիմնադիրներից արվեստագետ Էռնեստ Ոսկանյանը պատասխանատու է ստեղծագործական մասի, իսկ Մարիամ Հակոբյանը՝ մարքետինգայինի համար:
Ֆատատո չես կարող գտնել Վերնիսաժում, հուշանվերի խանութներում կամ handmade սրահներում. ի սկզբանե հեղինակների համար սա եղել է սկզբունքային հարց. մերժել են գործակցության բոլոր նմանօրինակ առաջարկները: Ոճն ու որակն առաջնահերթություն համարող ընկերության համար մեծ հաջողություն էր Գաֆէսճեան արվեստի կենտրոնի հետ գործակցությունը:
